تحقيق الارباح من خلال تطبيقات أندرويد

اهلا بك صديقي مطور الأندرويد في منصة كرسي.
في السلسله دي هنعرف ازاي ممكن تحقق الارباح من كونك مطور تطبيقات أندرويد في طرق كتير انك تحقق ارباح كونك مطور تطبيقات اندرويد علي سبيل المثال لا الحصر:

١- انك تشتغل في شركه
٢-انك تقدم خدمة علي احد مواقع الفري لانس زي موقع مستقل او اب ورك او موقع فري لانس
٣-انك تعمل تطبيق خاص بيك ويكون مشروعك الخاص ودا يكون هو البرنس ليك
٤-انك تعمل تطبيق وتضيف فيه اي خدمة اعلانيه واللي اشهرها خدمه جوجل ادموب

خلينا النهارده نتكلم عن الارباح من اعلانات جوجل. ايه هي اعلانات جوجل او فيما يعرف ب جوجل ادموب … بس الاول لازم تعرف اي هي خدمات جوجل ادموب..

خدمات جوجل ادموب

بختصار شديد عشان انت لو متعرفش ادموب … ادموب هي وسيله للمعلنين انهم يعلنوا في تطبيقات الموبيل سواء الايفون او الأندرويد عني حضرتك بتحط كده في التطبيق بتاعك مكان بتقول لجوجل ادموب دي فيه يا جوجل ادموب انا مجهز التطبيق بتاعي عشان يظهر فيه اعلانات المعلنين عندي ويبدا بعد كده تضيف شويه سطور بسيطه في التطبيق بتاعك وكده خلاص تطبيقك بقا جاهز ان ينزل عليه الاعلانات من جوجل يعني بختصار شديد جوجل بتقوم بدور الوسيط بينك وبين المعلنين انت بتوفر التطبيق اللي الناس هتشتغل عليه والمعلنين يعلنوا وهي توصل
الطرفين ببعض.

طيب قبل ما نبدا اصلا في الجزء الواضح لينا وهو انك تعمل تطبيق أندرويد خلينا نسال شويه اساله كده عن ازاي تكسب ارباح بقا من الاعلانات دي …


السوال الأول:

انا هقدر احقق ارباح قد ايه مثلا؟

تحقق الارباح من خلال تطبيقات أندرويد

هقولك هنا موضوع الربح بيختلف علي حسب نوع تطبيقك واهتمامات المستخدمين وكمان مكان تواجدهم واهم حاجه عدد المستخدمين النشطين اللي موجود علي التطبيق بتاعك يوميا… يعني مثلا كل ١٠٠٠ مشاهده للاعلان علي التطبيق بتاعك بيكون ليها قيمه وهنقول علي سبيل المثال لو كل الف مشاهده ب ١ دولار وانت التطبيق بتاعك عمل في اليوم مثلا الف مشاهده يبقي كده ١ دولار ولو المستخدم ضغط علي اعلان بيكون ليها سعر تاني خالص يعني ممكن الضغطة الواحده بس تتحسب ب واحد دولار وزي ما قولتلك الاسعار دي مختلفه من دوله للثانيه يعني مثلا المستخدم اللي بيشوف اعلانك وهو في امريكا غير مصر او اغلب الدول العربية

السوال التاني:

الفلوس دي (الارباح) اصلا هتيجي ازاي او انا هسحبها ازاي؟

تحقق الارباح من خلال تطبيقات أندرويد

الموضوع بسيط جوجل عامله حاجه اسمها ادسنس وعشان تكسب فلوس بتربط بقا ال ادموب ب ادسنس خلينا نشبه الموضوع با ان الادموب هو شغلك مثلا والادسنس هو البنك اللي شغلك بيحولك عليه الفلوس عشان تحقق التارجت توصلك تمام كده … انت بقا بتدخل تعمل حساب علي جوجل اد سنس وبعد كده بتربط الادموب عليه ولحد هنا
تمام …

بس عشان يجيلك فلوس لازم جوجل تاكد انك صاحب العنوان اللي انت بدخله في ادسنس من المعلومات اللي بتطلبها منك ف انت اول ما بتوصل ١٠ دولار يبعتولك علي البريد كود كده عشان تدخله علي الموقع بتاع اد سنس ولو موصلش ليك حاجه اول شهر بتبعت ليهم تقولهم انك موصلكش حاجه ولو الموضوع اتكرر شهر
مع التاني مع التالت بعد كده بيقولو ليك خد صوره من جواز سفرك سوفت كوبي وترسلها ليهم وبعدها بيتم تفعيل حسابك علي ادسنس…

لحد كده عرفنا ايه اللي هيظهر عليه فلوسك تعالي بقا اقولك هتسحب الفلوس ازاي … اول ما بتوصل ل ١٠٠ دولار بيكون عندك الفرصه انك تحسب فلوسك ولحد شهر ١٢ سنه ٢٠٢٠ كنت ممكن تستلم الفلوس من
وسترن يونيون بس للاسف اتلغت ودلوقتي بقت عن طريق حسابك البكي وكل يوم ٢١ في الشهر لو حسابك كان الشهر اللي فات معدي ١٠٠ دولار بيتم التحويل تلقائي … بس كده

السوال التالت بقا والمهم:

هل موضوع الارباح من اعلانات جوجل بالسهوله اللي ممكن اي مطور اندوريد يعملها !!

لا مفيش حاجه ما تتعبش عليها وتجيبلك فلوس كده من الهوا وهقولك ازاي في الكلام اللي جاي بس السوال دلوقتي هو ايه هي مواصفات بقا التطبيق اللي ممكن يجيبلي فلوس ؟

بص انت لازم تفكر في افكار كويسه حتي لو كانت مقلده بس باضافه صغيره فكر في حاجات تخدم كل الناس مش فئة معنيه ويكون كمان عندك عدد مستخدمين نشطين كتير يوميا …

وصدقني حتي لو انت عامل تطبيق بفكره موجوده بس مثلا بتجربه مستخدم افضل بكتير او باضافه صغيره الناس تحبها هتلاقي فعلا اللي يهتم بالتطبيق بتاعك وينزله … بس هل انت لو خلصت تطبيقك علي جوجل بلاي بس كده خلاص هيجبلك فلوس بعد ما تعرف… ولازم تتعب في انك تنشر التطبيق بتاعك بعد ما تعمله لانك لو هتقول عمل
تطبيق كويس عليه ٥٠ ٪ من نجاحه ففي ٥٠ ٪ تانييين انك تعرف تنشره كويس ولازم الرانك بتاعه علي جوجل بلاي يعلي بحيث انك توصل لمرحله انك خلاص مش محتاج تنشره هو كده كده خلاص بقا موجود علي جوجل بلاي مش بس كده بقا في تحميلات يوميا بدون ما اي تدخل منك خالص ..

طيب ازاي بقا تنشر التطبيق وتشغله كويس ؟

1 – اعمل حسابات علي مواقع التواصل الاجتماعي المختلفه وحاول وتوصل تطبيقك لكل الناس من خلال عمل اي حملات اعلانيه حتي لو بسيطه في البدايه

2- تابع المستخدمين دي من اهم النقطه انك ديما تتابع سلوك المستخدمين داخل التطبيق وتشوف امته ممكن يكون اكتف وامتي لا وكمان بانك تضيف جوجل انليتكس في التطبيق بتاعكىوكمان تتابع الكراشات في التطبيق اللي من خلالهم هتعرف تحل اي مشكله تواجه المستخدمين وبكده تحاول ديما توصل تطبيقك بافضل شكل ممكن .

3- ضيف الاشعارات في تطبيق وحاول تذكر المستخدمين بالتطبيق بتاعك بالاشعارات بحيث انك تذكرهم بتطبيقك لو حد مش بيفتح التطبيق لفتره طويله وهنا متقلقش مش محتاج اي شغل من اي باك اد جوجل عملالك صفخه تقدر تبعت اشعارات من فيربيز بكل سهوله ..

4- اعمل تحديثات تحل المشاكل اللي بتظر ديما وكمان ضيف فيتشرز في التطبيق بتاعك باستمرار

5- النقطه دي اهم حاجه هي الصبر علي الموضوع لانك ممكن تعمل فكره واتنين وتلاته وواحده بس اللي ممكن فيهم وتكسب منها فا انت متياسش جوجل ذات نفسها بتعمل مونتجات وبتفشل ومش بتكملها انت
بقا اللي تطبيقاتك اللي كلها هتنجح …

تطبيق

ودلوقتي خلينا ناخد مثال بقا نطبق عليه مثلا نقول اننا هنعمل تطبيق عن اهم الكتب اللي ممكن حد يقراها في مجالات مختلفه .. واكيد كلنا احيانا بنكون محتاجين ترشيحات لكتب عشان نقراها ..

اول خطوه : دراسه السوق الحالي

الخطوه دي مهمه جدا انك هتعمل سيرش علي جوجل بلاي وتشوف التطبيقات المتاحه ايه وحاول تنزل منها جزء كبير وادرس كل تطبيق. شوف كل واحد منهم مميز في ايه وافضلهم في التصميم ايه وبكده هتكون عندك خلفيه كبيره عن اللي موجود في متجر جوجل بلاي

تاني خطوة:البحث عن التميز

ولما بنذكر البحث عن التميز دي بناء علي الخطوه الاولي انك هتشوف ازاي من اللي شوفته علي جوجل بلاي من تطبيقات ايه اللي هيميزك عنهم ودي انت اللي محتاج تشتغل عيها شويه

تالت خطوه: التصميم الجذاب

لابد من الاهتمام بالتصميم الجيد لتطبيقك وجعل تجربه المستخدم افضل من اي منافس اخر ودي ممكن تستعين باحد الاصدقاء عشان يعملك تصمم جذاب اذا امكن

رابع خطوه: اطلاق التطبيق

بعد ما خلصت تطبيق وضيفت خدمه اعلانات جوجل اهم حاجه هي التسويق الجيد بعد الاطلاق للتطبيق مرحله البدايه لاي تطبيق هي الاصعب في الغالب لانك بتكون محتاج تثبت نفسك للمستخدم اللي حمل تطبيق علي جهازه تابع المستخدمين زي ما اتكلمنا قبل كده ومع الوقت وعدد التحميلات هتزيد تطبيقك هيكون ليه اسم علي جوجل بلاي ومع الوقت هيظهر في محركات البحث بكل سهوله.

وبكده يكون نهايه اول حلقه من سلسله تحقيق الارباح من برمجه تطبيقات الاندرويد واستنونا في الحلقه القادمة.

Related audio
09:34 Minutes

الربح من العمل الحر

أنور السيد

اهلا بيك صديقي مطور الاندرويدفي تاني بود كاست على منصة كرسي من سلسله الربح من […]

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

السلة